Ресторанд болзож байгаа мэт орчныг гэртээ бүрдүүлээд хайртай хүмүүстээ гарын хоолоо хийж халамж, хайраа мэдрүүлэхийг хүссэн хэн бүхэнд энэхүү ерөнхий тогооч Э.Энхбаярийн онцгой жорыг санал болгож байна.
Хугацаа: 30 минут
Порц: 4 хүн
Тохиромжтой хачир: Жигнэсэн хүнсний ногоо, нэрсний соус
Стэйк
Томахоук стэйкээ розмарин, давс, перецээр амтлаад хээтэй грилл дээр шарна. Шарсан стейкээ амраагаад алимны модоор утна. Ахин амраагаад нэмж бага зэрэг шарна. Дунд зэргийн болголттой шарж идвэл тохиромжтой. Хүсвэл шатдаг цаас ашиглан үзүүлбэртэй үйлчилж болно.
Үндсэн хачир
Сайн сортын төмс сонгож аваад чанаж бэлтгэнэ. Чанасан төмсөө нухаш дээр нь цөцгийн тос, сүү, давс, сүүн крем, розмаринаар амтлаад бэлэн болно.
Туслах хачир
Үрлэн лоолио шарах шүүгээнд шарж бэлэн болгоно. Жижиг лууван, аспарагус, ягаан цэцэгт байцаа, брюссель байцаа зэргийг жигнэж амтлаад таваглана.
Нухаш
Шар хулуугаа шарах шүүгээнд шарна. Саримс, цагаан гаа, порей ногоон сонгино, цөцгийн тосонд шараад, дээр нь болсон шар хулуугаа хийгээд, ногооны шөл нэмж буцалгаад, давсаар амтална.
Чөмөгтэй яс
Үхрийн чөмөгний яснаас чөмгийг салгаж аваад розмарин, саримс, давсаар амтлаад хэвлэж хөлдөөнө. Өндөг, сүү, гурилаар зуурмаг бэлдээд хөлдсөн чөмгөө дүрээд талхны үйрмэгээр бүрнэ. Бүрсэн чөмгөө их тосонд шарж аваад бэлэн болно.
Хийжүүлсэн хөгцтэй бяслагны соус
Үхрийн булууны ясыг амтлаад удаан чанаж бэлдээд үхрийн шөл гаргаж авна. Үүн дээрээ хөгцтэй бяслаг, давс, сүүн крем хийж буцалгаад соус бэлэн болно. Болсон соусаа хийжүүлэгч төхөөрөмжинд хийжүүлснээр бэлэн болно. Энэхүү шинэлэг соус нь тус үхрийн махан стэйктэй төгс зохицдог.
Холбоотой бүтээгдэхүүн
